На працягу апошніх гадоў 21 лютага ва ўсім свеце адзначаецца Міжнародны дзень роднай мовы, заснаваны ЮНЭСКА па ініцыятыве Бангладэш.  Свята ўзнікла дзеля таго, каб папярэдзіць знікненне  ўнікальных  гаворак і захаваць моўную разнастайнасць,  падтрымаць нацыянальныя культуры, а таксама  забяспечыць права кожнага чалавека на карыстанне роднай  мовай.   Сёння прэстыжна  валодаць замежнымі мовамі: англійскай, нямецкай, кітайскай. А роднай, беларускай? Беларускую мову  мы вывучаем у школе, каледжы,  нядрэнна разумеем, але мала ёю карыстаемся  і свабодна  на ёй гаворым. Для большасці грамадзян нашай краіны пастаянным сродкам зносін з’яўляецца руская мова. Таму з мэтай папулярызацыі роднага, беларускага слова ў ДУА «Цяцерынскі сярэдняя школа імя А. С. Лукашэвіча»  з 20 лютага па 22 лютага 2024 года прайшлі мерапрыемствы, прысвечаныя Міжнароднаму дню роднай мовы.  На працягу гэтага перыяду для вучняў і настаўнікаў у кабінеце працавала выстава мастацкай літаратуры «Гучы праз вякі, мая родная мова!» Таксама ва ўстанове адукацыі прайшла акцыя «Рускай мове дай разгрузку – размаўляй па-беларуску», мэтай якой было выхаванне ў вучняў любові і павагі да роднай мовы, гісторый і культуры беларускага народа. Класнымі кіраўнікамі 3-11 класаў былі падрыхтаваны і праведзены разнастайныя мерапрыемствы (з улікам узроставых асаблівасцей дзяцей). Гэта і конкурсныя праграмы «У свеце слоў» (3-4 клас) «Вандроўка ў родную мову»(5 клас), «Размаўляем па-беларуску»(6 клас), віктарына «Каралеўства мовы і літаратуры» (7клас), інтэлектуальныя гульні  «Пяць зорак» (8-9 клас),  «Лепшыя  беларусазнаўцы»(10-11 клас).  Таксама ў кожным класе праводзіліся інфармацыйныя і класныя гадзіны, прысвечаныя Міжнароднаму дню роднай мовы, анкетаванне «Мае адносіны да роднай мовы». Пад кіраўніцтвам настаўнікаў беларускай мовы і літаратуры вучні нашай установы адукацыі прынялі актыўны ўдзел у конкурсе малюнкаў «Беларуская казка», конкурсе сачыненняў «Ці патрэбна беларусам родная мова?», акцыі «Чытаем родныя радкі», лінгвістычным конкурсе «Буслік-2024», дзе вучні паспрабавалі сябе ў ролі юных мастакоў, пісьменнікаў і паэтаў, а таксама прадэманстравалі свае аратарскія ўменні, інтэлектуальныя здольнасці.   Хочацца верыць, што усе вучні, якія душой дакрануліся  да багатай  культурнай спадчыны беларускага народа, будуць імкнуцца, каб роднае слова гучала ў вяках.

Настаўнік беларускай мовы  Дзмітрый Анатольевіч Ігнатковіч